তাইৰ সেমেকা খোজত
প্ৰাণ পাই উঠে এই সৃষ্টি ৷
সেমেকি উঠে এই ধৰা,
হালি-জালি নাচি উঠে কঁহুৱা বননি ৷
শেৱালিয়েও আমোল মোলাই
সুগন্ধিৰ পাখি মেলি উৰি ফুৰে আনন্দত ৷
তাইৰ পৰশত এচাতি এচাতি ব'লে ৰিব্ ৰিব্ মলয়া ৷
তাইৰ আগমনৰ আবেলিবোৰে
গহীন হৈ পৰে ৷
জোনাকেও ৰ'হ লাগি চাই ৰয় এপলক মৃদু দৃষ্টিৰে ।
ধৰাৰ বুকুলৈ নামি আহে
কিন কিন বৰষুণ ৷
নদীয়েও তাইৰ প্ৰেমত পৰি
মৌন হয় বয়,
পক্ষীবোৰে গীত যোৰে
সেমেকা সুৰত..........
এনেকৈ নামি আহে সেমেকা শৰত ৷
