মই কুশলে নাই (দীপ্তি দেউৰী বৰা)

কেনেকৈ কওঁ মই কুশলে আছোঁ
নাভিত নিৰৱতা কোন পাণ্ডু পুত্ৰৰ
কোনটো শংখ বজাই ভাঙিম নিৰৱতা
মই কুশলে নাই
হৃদয়খন লগত নাথাকিলে কুশলে থকা নাযায় ৷

পথাৰ চহ কৰোঁতে
সেই মৰতীজনীয়ে কেতিয়ানো চহালে বুকু
সৰিয়হ অলপ সিঁচো বুলি ভাবোতেই...
গুচি গ'ল ৷
নাজানিলো..
তাইৰ হৃদয় তাইৰ লগত নাছিল
মোৰ লগতো নাছিল ৷

হৃদয়ৰ বিপণীত মোৰ হৃদয়ৰ মূল্য নগণ্য
সমাজক দোহাই দিলো
ভগৱানক দোহাই দিলো
হাৰি গ'ল নামঘৰৰ চাকি ৷

পোনাটিৰ মুখখন তাইৰ আগত তুলি ধৰিছিলোঁ
হৃদয় কিজানিবা থমকি ৰ'ব সৰিয়হ ডৰাও হ'ব .........

মোৰ নাভিত হতবাক নিৰ্জনতা
এতিয়া মাটিডৰাত জুইফুল সৰিছে ৷